أحمد حسن الديب، شاعر عامية شاب من مواليد الثمانينيات، يعمل بالمحاماة، وله قصائد مسجلة في هيئة “الرقابة على المصنفات الفنية”، وهو يستعد للتعاون مع عدد من المطربين الشباب، منهم هاني عادل ومحمد نور مصطفى حجاج وأيهم.
Table of Contents
إخوات وأهل
مسيحي مسلم دم واحد
والتاريخ هو اللي شاهد
مصر كلها يد واحدة
الشهيد عن مصر دافع
في الكنيسة او في جامع
دمه بيقول النهاردة
جيبوا حقي من الجبان
وحق اولادنا كمان
اللي ماتوا في الكنايس
كلنا فداكي يا بلدي
مش هايغلى عليكي ولدي
علموهم في المدارس
خلوا كل الشعب يفهم
مصر لمسيحي ومسلم
وأننا اخوات وأهل
علموهم يعني ايه التضحية
وان أمن مصر أكبر أمنية
والموت فدا بلدنا سهل
الدنيا متسواش
بحاول ارسم ضحكة قد الكون
وأجري ورا الفرح وين ما يكون
وأحلم ببكرة وفكرة لابد تت حقق
أملي ان أعمل للسعادة قانون
الدنيا حلوة عيشها بسعادة
عيش كل لحظة خلي بسمتك عادة
وحب الناس وخلي الحب عنوانك
هتلاقي أيامك بقت سكر زيادة
إوعاك تكشر دي الضحك ببلاش
متسيبش لحظة حلوة متعيشهاش
اضحك يطول عمرك وصباك
هتحزن ليه دي الدنيا ماتسواش
مركب خصوصي
الغرب فيه الحلم
وبلادنا فيها كابوس
الناس بتعطش
الغرب يسقيهم
الناس تخاف
الغرب يحميهم
بلاش نقول احنا ضعاف
والغرب ناس شيك لطاف
يدونا بالإيد اليمين معونات
ياخدوها بالإيد الشمال صفقات
كل حاجة بالفلوس
يحصدوا بيها النفوس
والجبان بكرة يموت
برصاصة ماليهاش أي صوت
واللي يتكلم .. جاسوس
واللي يسكت خد فانوس
كل ده مش لاقي مخرج
اني ناوي منها أهج
لجل اهرب من كابوسي
لو قالولي الموج هايخدك
عادي….
ما هو خد فلوسي
موافق اهرب منه واهلك
الموت عايز مركب خصوصي !!!
دي مراكب ولا توابيت
مات الصبي والشب
الحزن في كل بيت
عشان هرب
من فقر صعب
من عيشة كرب
جوة عتمة بحر ضلمه
جوه مركب صيد بدائي
والعقول مليانه همة
تستنى كلمة
وصلنا بر الأمان
إيطاليا ولا اليونان
المهم اني ألاقي
فرصة في اي مكان
مش أعيش جبان
وأموت جعان
يا بلدنا ليه مش سمعانا
ومعاندة ليه بس معانا
مش لاقي فيكي رغيف
ولا حتى فهمانا
عايزاني أسكت
أديني سّكت
طقيت وهربت
في البحر غرقت
ويتمني موقع موهوبون للشاعر أحمد الديب المزيد من الإبداع والتألق..
/bm/85.bmp)
