مبدعونشخصيات علمية

تعرف علي الدكتور ماهر أبوجنديه

تعرف علي الدكتور ماهر أبوجنديه

 

المستشار “ماهر ابو جندية”… مواطن مصري عادي من اب وام مصريين مركز مطوبس محافظة كفر الشيخ… ابوه الحج كان تاجر جملة شاطر وعلمه التجارة… ولما تسمع المستشار ماهر وهو بيتكلم عن ابوه تحس بفخر مصري غايب تماما اليومين دول…

حلو… مين بقى المستشار ماهر ابو جندية ده؟؟

كان شاب… اتخرج من كلية الزراعة جامعة الاسكندرية… ودور على شغل في مصر… ووصل بعد ما تعب واشتغل بكل طاقته انه يبقى رئيس قسم الشيكولاتة في شركة بسكو مصر

كفاية كدة؟؟  

لا طبعا.. الراجل ما كدبش خبر… حس ان طموحه بينهار في البلد هنا… شيكولاته ايه وقرد ايه  ؟؟؟

راح هووووب هيلا بيلا واخد هدومه في بؤجة وطالع على امريكا… راسه لفوق… عينه لفوق… طموح اطول من مبنى الامباير ستيت في امريكا…  درس… ذاكر… عمل ابحاث… عادي جدا راح واخد الدكتوراه من جامعة نورث داكوتا… 

الله عليك… كفاية كدة؟؟

لا برضك … راح بقى بالدكتوراه الجديدة بتاعته اشتغل باحث في شركة “جينرال ميلز” تخصص كيمياء حيوية.. ايه يا خويا الكيميا الحيوية دي؟؟ قبل الاعدادية والا بعد الاعدادية ؟؟ مش مهم.. ما علينا…

راح عامل دراسات مهمة في القمح… وقدمها هناك.. الامريكان يا عيني ما صدقوش… وأخد جايزة من شعبة الخبازين الاميركيين على مساهمته في تحسين محاصيل وسلالات القمح

اظن بقى كفاية كدة..

لاااااا… كندا بقى نطت في الموضوع ….  وخطفته هيئة القمح الكندية… عقد احتراف… ماهو اصل اللي زي ده ماينفعش يقعد في البيت ابدا الال في مصر عندنا.. يحسن من مستوى الشوكولاتة الكورونا في الاخر  وبعدين برضو يجيلنا اسهال

راح كندا من هنا… والناس هناك متابعة وشايفة وبتقرأ الابحاث… راحوا مخلينه بقي مسئول عن تنمية الاسواق العالمية في هيئة القمح الكندية لمدة ٨ سنوات… يا مراري يا أما  

المستشار ماهر ابن تاجر الجملة بتاع مطوبس بقى المسئول الأول في كندا عن تصدير القمح الكندي ل٦٠ دولة في العالم… والمصحف الشريف  

الحمد لله… كفاية كدا قوي بقى…

اصبر اصبر.

وزارة الخارجية والتجارة الكندية قالت :مين الراجل الظريف ابو قميص كاروهات حلو ده؟؟! هاتووه

ادوله الجنسية الكندية… اللي هو احيه بالعربي… 

وبقي الملحق التجاري لكندا في ٦ دول “سوريا والصين وايران ولبنان والامارات والاردن” واللي يعشق جمال النبي يصلي عليه

كفاية ارجوك….

سيادة المستشار بقى الملحق التجاري… وبعدين بقي قائم بأعمال السفير الكندي في الامارات وايران…

كفااااااااااااااااية…

بعد كده بقي مستشار وزير الخارجية والتجارة الدولية الكندية ٠٠

دي عينة من المصريين اللي عايشين برة مصر… الراجل “مستشار” بحق وحقيقي …  
الراجل بيقول بالفم المليان… لو حد من مصر طلبني… حاجي زاحف من كندا لمصر…

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى